ДАЛИ ЗНАЕТЕ – МАЈКА ТЕРЕЗА ВО СКОПЈЕ/РИСТО ГАРЕВСКИ

Заедно со честитката за добиената Нобелова награда од граѓаните на Скопје и покана повторно да го посети родниот град, пристигнува, благодарноста и одговорот на Мајка Тереза. „Очекувајте ме во родниот град, носталгијата брзо ме влече“. Порачува Мајка Тереза за веќе на 27 и 28 јуни 1980 година, по третпат, официјално да дојде во Скопје. Гостин е на својот роден град, кој ја прогласува за заслужен граѓанин, доделувајќи и ја спомен плакетата на Скопје. Малку е познато дека од трите бора, кај спомен плочата пред ЕВН, еден од нив Мајка Тереза го насадила во 1980 година, кога беше прогласена за почесен граѓанин на Скопје.
Ристо Гаревски (22.3.1922 -21.2.2012) македонски палеонтолог, припаѓа на првата генерација биолози во Македонија. Во близината на цигланата „Киро Ќучук“ во Велес, Гаревски пронашол три глави од носорози и една глава од мастодонт – вид слонови што живееле пред десет милиони години. Во близина на скопското село Орешани откопал и заби од мамути што живееле пред 20.000 години. Според Гаревски, најбогати области со фосилни остатоци се Тиквешијата, велешко-оризарските и валандовските краишта. Освен по истражувачките откритија, д-р Ристо Гаревски е заслужен за формирањето на одделот за палеонтологија во Природонаучниот музеј на Македонија, каде што минал најголем дел од својот работен век.