ВАКЦИНАЦИЈАТА ПРОТИВ СЕЗОНСКИ ГРИП ПОЧНУВА ДЕНЕСКА – 70.000 ДОЗИ ВАКЦИНИ ДОСТАПНИ ЗА РИЗИЧНИТЕ ГРУПИ

Вакцинацијата против сезонскиот грип започнува денеска на 36 локации низ државата, при што над 32.000 граѓани веќе се пријавиле за вакцинација. Во Скопје, граѓаните ќе можат да се вакцинираат во Центарот за јавно здравје, како и во поликлиниките Букурешт, Идадија и Бит Пазар, додека во Институтот за јавно здравје (ИЈЗ) вакцини ќе бидат достапни само за здравствените работници. Сите пријавени преку официјалниот веб-сајт ќе добијат СМС порака со точниот датум и време за вакцинација. Министерството за здравство оваа година набави 70.000 дози четиривалентни вакцини, што претставува зголемување во однос на претходните години. Бесплатната вакцинација е наменета за ризичните категории на граѓани, меѓу кои се повозрасните лица над 65 години, лица со хронични заболувања, здравствени работници, бремени жени, деца од 6 месеци до 5 години, како и лица и вработени во установи за социјална заштита на стари лица. Комерцијални вакцини се достапни во Центрите за јавно здравје за граѓаните кои не припаѓаат на ризичните групи.