ДОКУМЕНТАРЕН ФИЛМ ЗА БИТЛСИ 64, НА ДИЗНИ ПЛУС

Оваа есен, по успешните документарни филмови за Битлси, ќе биде објавен нов филм кој го анализира пробивот на групата на американскиот пазар во февруари 1964 година. Документарниот филм „Битлси ’64” (The Beatles ’64), продуциран од легендарниот Мартин Скорсезе, ќе се емитува на платформата Дизни плус на 29 ноември. Филмот вклучува новопронајдени снимки од периодот, интервјуа со Пол Макартни и Ринго Стар, како и сведоштва од лица на кои „инвазијата” на Битлси имала значајно влијание. Филмот, кој го режираше Дејвид Тедеши, содржи архивски материјали, вклучувајќи реставрирани снимки од првиот настап на Битлси на американската телевизија во емисијата „Шоуто на Ед Саливан” и 4К снимки од првиот концерт во САД, одржан во Вашингтон на 11 февруари 1964 година. Проектот вклучува и аудио ремиксирање од Џулс Мартин, син на продуцентот на најважните песни и албуми на Битлси, Џорџ Мартин, со цел да се прочистат старите аудио ленти и да се подобри квалитетот на звукот.