ПРОБЛЕМИ СО ЗАЛИХИТЕ ВО МЕДИЦИНАТА – НЕИСКОРИСТЕНИ АКЦЕЛЕРАТОРИ ВО КЛИНИКИТЕ

Во ревизорскиот извештај за 2023 година за ЈЗУ Универзитетска клиника за радиотерапија и онкологија, Државниот завод за ревизија утврди низа неправилности во управувањето со залихите. Недостасува усогласување меѓу сметководствената евиденција и фактичката состојба на лековите, со задоцнувања при евидентирањето на нивниот прием и издавање, како и непријавување на донации вредни 33 милиони денари, што ја нарушува целосноста на финансиските извештаи. Дополнително, во извештајот е нагласено дека два линеарни акцелератори во Клиниката не се користат, иако три останати активно опслужуваат 180-200 пациенти дневно, што отвора прашања за оптимизацијата на капацитетите. Слични неправилности се регистрирани и во ревизорскиот извештај за 2021 година, за што е во тек постапка пред надлежните органи.