Министерот за транспорт Александар Николоски најави амбициозен проект за организирање директни прекуморски интерконтинентални летови од Скопскиот аеродром, што ќе биде уникатно не само за Македонија, туку и за регионот. На Конференцијата во организација на Меѓународната федерација на асоцијации на контролори на летање, Николоски истакна дека овој проект е значаен за привлекување нови туристи и за задоволување на потребите на македонската дијаспора која сака да лета директно од Скопје. Николоски акцентираше на важноста на контролата на летање како клучен сектор, нагласувајќи дека професијата бара високи стандарди на образование и професионалност.
Тој изрази задоволство што Македонија е домаќин на европскиот регионален состанок на Асоцијацијата за контрола на летање, верувајќи дека ќе бидат споделени нови искуства и практики во областа. Според него, целта е да се зголеми авиосообраќајот од македонските аеродроми и да се реализира нова кампања за субвенционирање на летови, која во моментот поминува низ евалуација.